“Mançester Siti” ÇL həsrətinə son qoydu!

Bu gün UEFA Çempionlar Liqasında 2022/2023 mövsümünün final oyunu keçirilib.

Komanda.az xəbər verir ki, Türkiyənin İstanbul şəhərində keçirilən həlledici matçda İngiltərənin “Mançester Siti” və İtaliyanın “İnter” komandaları qarşılaşıb.

Atatürk Olimpiya Stadionundakı qarşılaşmanı polşalı FİFA referisi Şimon Marçinyak idarə edib.

Çempionlar Liqasında ikinci dəfə finala yüksələn “Mançester Siti” hələ ki, bu turnirdə qalib olmamışdı. “İnter” isə ÇL-də keçirdiyi 6 final görüşünün yarısında qələbə qazanmışdı.

Bu finalda isə sevinən tərəf Mançester təmsilçisi olub. Nəticədə bu komanda həm ilk dəfə ÇL-i qazanıb, həm də treblə imza atıb. Mançesterlilər bu mövsüm İngiltərə Premyer Liqasının və kubokunun da qalibi olmuşdular.

UEFA Çempionlar Liqası, final

10 iyun

Mançester Siti (İngiltərə) – İnter (İtaliya) 1:0
Qol: Rodri, 68.
Baş hakim: Şimon Marçinyak (Polşa)
İstanbul, Atatürk Olimpiya Stadionu

Mançester Siti: 31. Ederson, 3. Ruben Dias, 5. Con Stounz, 6. Natan Ake, 8. İlkay Gündoğan, 9. Erlinq Haland, 10. Cek Qriliş, 16. Rodri, 17. Kevin De Bruyne, 20. Bernardo Silva, 25. Manuel Akanci
Baş məşqçi: Xosep Qvardiola.
İnter: 24. Andre Onana, 2. Denzel Dumfris, 9. Edin Dzeko, 10. Lautaro Martines, 15. Françesko Açerbi, 20. Hakan Çalhanoğlu, 23. Nikola Barella, 32. Federiko Dimarko, 36. Matteo Darmian, 77. Marselo Brozoviç, 95. Alessandro Bastoni
Baş məşqçi: Simone İnzaqi.