“Sabah”ın yeni transferi: “Qərar verməyimdə bu amilin böyük rolu oldu” – Müsahibə

“Sabah”ın yeni transferi Mixeil Erqemlidzenin Komanda.az-a müsahibəsi:

• Azərbaycan Premyer Liqasının ilk turunda “Səbail”ə məğlub olduz (0:1). Debüt oyunun haqda fikirlərin nədir?
• Fikrimcə, biz yaxşı oynadıq. Lakin əldə etdiyimiz qol fürsətlərindən yararlana bilmədik. Artıq bu matç keçmişdə qalıb. İrəli baxmaq lazımdır. Bu qarşılaşmanı unudub, qarşıdakı matçlarımıza köklənməli, növbəti oyunlarda qələbə qazanmaq üçün əlimizdən gələni etməliyik.
• Yəqin ki, turun digər oyunlarına da baxmısan. Azərbaycan Premyer Liqası ilə bağlı təəssüratların necədir?
• Əlbəttə, digər komandaların da oyunlarını izləmişəm. Çempionatda iştirak edən bütün komandalar yaxşı futbol sərgiləyir. İlkin təəssüratlarıma əsasən deyə bilərəm ki, komandalar arasında ciddi səviyyə fərqi yoxur.
• Tbilisi “Dinamo”sundan ayrılıb, Azərbaycanı seçməyinə səbəb nə idi?
• “Sabah” böyük hədəfləri olan komandadır. Qərar verməyimdə bu amilin böyük rolu oldu. Bu komanda ilə yeni mövsümdə uğur qazanmaq və avrokuboklarda iştirak etmək istəyirəm.
• Ötən mövsüm Türkiyənin “Adana Dəmirspor” klubunda icarədə olsan da, şans qazana bilmədin. Nə üçün Türkiyə macəran qısa və uğursuz alındı?
• Orda legioner limiti var idi. Sadəcə, mənə şans verilmədi, mən də mövsümün sonunda ayrıldım.
• Azərbaycan futbolu Gürcüstanda necə qiymətləndirilir? Hansı ölkənin futbolu səviyyə baxımından daha üstündür?
• Gürcüstanda yerlə oynamağa daha çox üstünlük verilir, yəni hava toplarından çox istifadə olunmur. Temp isə burdakından aşağı olur. Düzdür, Azərbaycan futbolunda da yerlə oynamağa üstünlük verilir, lakin oyunun tempi və ritmi daha yüksək olur.
• “Sabah”ın hücum xəttində səndən başqa, Xulio Sezar Rodriqes, Tiemoko Fofana kimi hücumçular var. Rəqabət aparmaq və əsas heyətə düşmək çətin olmayacaq?
• Komandadakı həmkarlarıma çox hörmət edirəm. Lakin mən həm məşqlərdə, həm də oyunda əlimdən gələni edəcəm ki, özümü sübut edim və əsas heyətdə yerimi alım.
• “Sabah”dakı hədəflərin nələrdir?
• “Sabah”da əsas bir məqsədim var. Bu da çempionatda uğurlu nəticə qazanmaq və komandanın heyətində avrokuboklarda iştirak etməkdir.

Şahin Cəfərov