“Yuventus”da olmağın məsuliyyətindən qaça bilmərik”

“Yuventus”un qapıçısı Voyçex Şesnı İtaliya çempionatının 18-ci turu çərçivəsində səfərdə “Roma” üzərində qələbədən (1:0) danışıb.

Komanda.az DAZN-a istinadən xəbər verir ki, o, komandanın təkmilləşməli və liderliyə yüksəlməli olduğunu deyib:

“Mövsümün ilk hissəsi yaxşı keçdi. Bir oyunumuz qalıb və 46 xal toplaya bilərik, bu, əla nəticədir. Məqsədimiz Çempionlar Liqasına vəsiqə qazanmaq idi. Amma biz “İnter”dən iki xal geriyik, ona görə də qazanmağı arzulamalıyıq. “Yuventus”da olmağın məsuliyyətindən qaça bilmərik, ona görə də, əsas məqsədə çatmağı xəyal etməliyik.

Düşünürəm ki, bizim oyun tərzi baxımından təkmilləşmək üçün yerimiz var. Başlanğıc nöqtəmiz həmrəy olmaq və şanslarımızdan maksimum yararlanmaqdır. Mövsümdə 20-30 qol vura bilən hücumçularımızdan maksimum yararlanmaq üçün hücum mərhələsində çox iş görülməlidir”.

18 turdan sonra “Yuventus” 43 xalla A Seriyasında ikinci pillədə qərarlaşıb. Çempionata “İnter” başçılıq edir (45 xal).