“Vacib olan doğru transferi düzgün zamanda etməkdir” – Klopp

“Liverpul”un baş məşqçisi Yurgen Klopp klubun transfer siyasəti ilə bağlı açıqlama verib.

Komanda.az İngiltərə mətbuatına istinadən xəbər verir ki, alman mütəxəssis, “qırmızılar”ın transferlərdə aktiv olmamasını belə izah edib:

“Hazırda heyətdə olan futbolçular inkişaf edir. Keçən mövsüm 99, daha əvvəlki il 97 xal toplamış komandadan danışırıq, amma yenə də oyunumuzda yaxşılaşdıra biləcəyimiz nüanslar var. Vacib olan doğru transferi düzgün zamanda etməkdir. Hazırda demək olar ki, bütün klublar qeyri-müəyyən bir vəziyyətdədir. Biz də fərqli komandayıq. Hər kəs heyəti yaxşılaşdırmaq istəyər, amma bunun fərqli yolları da var. Keçən il Çempionlar Liqasını, bu il Premyer Liqanı qazandıq və bunları bir anda etmədik. Transfer bazarında “Çelsi” kimi davrana bilmərik. Dünyanın ən yaxşı futbolçularını bir araya gətirib, onlardan ən yaxşı oyunu göstərməyi istəyə bilmərik. Bu, məşqlə, birlikdə çalışmaqla əlaqədardır”.