“Tottenhem”in futbolçusu olmaq istəyirdim”

“Atletiko”dan ayrılan yarımmüdafiəçi Konor Qallaher “Tottenhem”ə keçidi ilə bağlı təəssüratlarını bölüşüb.

Komanda.az xarici KİV-ə istinadən xəbər verir ki, 25 yaşlı ingiltərəli futbolçu London klubuna transferindən böyük məmnunluq duyduğunu bildirib:

“Tottenhem”ə keçid mənim üçün xüsusi əhəmiyyət daşıyır. Burada olduğum üçün çox xoşbəxtəm və həyəcanlıyam. Bu, mənim üçün çox şey deməkdir. Klubun nə qədər böyük, azarkeşlərinin necə möhtəşəm olduğunu bilirəm. Onun bir hissəsi olduğum üçün sadəcə çox sevinirəm.

Transfer prosesi olduqca sürətli baş tutdu, çox tez reallaşdı və bu əla idi, çünki istədiyim də məhz bu idi. “Tottenhem”in futbolçusu olmaq istəyirdim və xoşbəxtlikdən, klub da mənim hisslərimi bölüşürdü. Nəticədə, hər şey asan və sürətli oldu.

Karyeramda yeni mərhələyə hazıram. Cəmi 25 yaşım var, amma artıq yaxşı təcrübə toplamışam. İndi növbəti addımı atmağa hazıram. Premyer Liqadan il yarım uzaq qaldıqdan sonra bu möhtəşəm kluba qayıtdım. Kluba fayda vermək, onun uğurlarında və inkişafında rol oynamaq istəyirəm. Bunun üçün əlimdən gələni edəcəm və mümkün qədər çox çalışacam”.