Keçmiş futbolçu “Barselona”nın yeni transferini “ağ yuyub, qara sərdi”

“Liverpul”un keçmiş futbolçusu və baş məşqçisi olmuş Qrem Suness, İngiltərə yığmasının vingeri və “Barselona”nın yeni transferi Entoni Qordonun çıxışını kəskin tənqid edib.

Sunessin fikrincə, Kataloniya klubu 70 milyon funt-sterlinqə (təxminən 83 milyon avro) transfer etdiyi cinah oyunçusunun dünya çempionatının qrup mərhələsindəki matçlarından sonra seçimindən şübhələnə bilər.

Komanda.az xarici KİV-ə istinadən xəbər verir ki, o, Qordonun belə oyunla “Barselona”da uzun müddət qalmayacağını bildirib:

“Tamamilə ədalətli olar ki, deyək: “Barselona” İngiltərə millisinin qrup oyunlarında yeni transferi Entoni Qordonun çıxışını izləyəndə “biz kimi almışıq” sualını verib.

Qordon Xorvatiya və Qana yığmalarına qarşı oynadığı qədər ehtiyatlı çıxışını “Barselona”da da davam etdirsə, Kataloniyada uzun müddət qalmayacaq. Dünyanın ən böyük klublarından birində uğur qazanmaq üçün təkcə ispanca danışmaq kifayət deyil. Ümid edirəm ki, o, İspaniya millisinin dünya çempionatındakı oyunlarını izləyib və onu nələrin gözlədiyini anlayıb.

Qordon tamamilə fərqli bir dünyaya düşüb. Mövsüm başlayandan sonra onun sol cinahdakı oyunu daim sağ cinahda çıxış edən Lamin Yamalın performansı ilə müqayisə olunacaq. Yamal cinah oyunçusunun ideal nümunəsidir. Onun Səudiyyə Ərəbistanı millisinə qarşı matçda nə etdiyini hamımız gördük. Kim düşünürsə ki, “Barselona”da heç kim Yamalın oyununu Qordonunku ilə müqayisə etməyəcək, özünü aldadır.

İngiltərənin Qana ilə 0:0 hesablı heç-heçəsini izləyərkən çox məyus oldum. Daha artığını gözləyirdim. Qordon da, Noni Madueke də zəif oynadılar. Qordon İngiltərə millisinin ehtiyac duyduğu səviyyədədirmi? Məncə, qətiyyən Bukayo Sakanın səviyyəsinə çatmır”.