Modriç: “Tezliklə hər şeyi biləcəksiz”

Xorvatiya millisinin kapitanı Luka Modriç, böyük ehtimalla, yığmadakı son oyununa çıxıb.

40 yaşlı yarımmüdafiəçi DÇ-2026-nın 1/16 finalında Portuqaliya millisinə qarşı keçirilən matça start heyətində başlayıb. Ancaq o, komandasını məğlubiyyətdən xilas edə bilməyib. Xorvatiya millisi 1:2 hesabı ilə uduzaraq mundialla vidalaşıb.

Turnir başlamazdan əvvəl mətbuatda Modriçin mundialdan sonra karyerasını başa vuracağı ilə bağlı xəbərlər yayılmışdı. Lakin futbolçu hələlik bu məlumatı təsdiqləməyib.

Komanda.az ESPN-ə istinadən xəbər verir ki, matçdan sonra gələcəyi ilə bağlı sualı cavablandıran Modriç bunları deyib:

“İndi bu haqda danışmağın vaxtı deyil. Tezliklə hər şeyi biləcəksiz”.

“Real”ın sabiq yarımmüdafiəçisinin “Milan”la müqaviləsinin müddəti bu yaxınlarda başa çatıb. Bununla belə, italiyalılar hələlik onun komandadan ayrıldığını rəsmən açıqlamayıblar.