Azərbaycan millisinin lisenziya yarışı üçün heyəti

Mayın 6-dan 9-dək Bolqarıstanın paytaxtı Sofiyada güləş üzrə dünya olimpiya təsnifat turniri keçiriləcək.

Komanda.az xəbər verir ki, Tokio olimpiadasına lisenziya qazandıracaq sonuncu yarışda hər üç güləş növü üzrə Azərbaycan milliləri iştirak edəcək. Yunan-Roma güləşi üzrə mübarizə turnirin son iki günündə keçiriləcək.

Baş məşqçi Aleksandr Tarakanov, böyük məşqçi Rövşən Bayramov və məşqçi Həsən Əliyevin rəhbərliyi altında Murad Məmmədov (60 kq), Rəsul Çunayev (67 kq), Rafiq Hüseynov (77 kq), Murad Lokyayev (97 kq) və Beka Kandelaki (130 kq) Sofiyada olimpiya oyunlarına vəsiqə qazanmağa çalışacaq. Komandamız Bolqarıstana mayın 6-da yollanacaq.

Güləşin bu növündə İslam Abbasov (87 kq) martda Macarıstanda keçirilən Avropa olimpiya təsnifat turnirində lisenziya qazanıb.