Özünü “axtaran” milli komanda

İyunun 1-dən 10-na kimi Avstriyada təlim-məşq toplanışında olan Azərbaycan millisi bu müddətdə iki yoxlama oyunu keçirdi. İyunun 5-də Malta yığmasına 0:2 hesabı ilə məğlub olan Ayxan Abbasovun rəhbərlik etdiyi komanda, dünən San Marino üzərində 2:1 hesablı qələbə qazandı.

Bu toplanış təkcə yay hazırlığı yox, həm də uzun müddət əcnəbi mütəxəssislərin idarəçiliyində olan milli komandanın yerli baş məşqçinin rəhbərliyi altında necə formalaşacağına dair ilkin “eskiz” idi. Bir qələbə və bir məğlubiyyət nəticədən çox, ümumi mənzərəni ortaya qoydu. Və bu mənzərə kifayət qədər ziddiyyətlidir.

Malta ilə oyun: “Güzgü”dəki reallıq

Malta yığması ilə qarşılaşma, əslində, komandanın hazırkı vəziyyətini daha aydın göstərdi. Azərbaycan millisi topa nəzarətdə və hücum quruculuğunda ciddi çətinliklərlə üzləşdi. Ara-sıra yaradılan fürsətlərdən istifadə edilə bilməməsi, hücumda “dişsizlik”, sonlandırmada qeyri-dəqiqlik məğlubiyyətin əsas səbəblərindən biri oldu.

Rəqib böyük futbol ölkəsi olmasa da, daha oturuşmuş sistemə malik komanda təsiri bağışladı. Azərbaycan millisi isə xüsusilə, orta xətdə boşluqlara yol verdi, pressinqdə gecikdi və top itkiləri ilə rəqibə rahat keçidlər verdi. Bu baxımdan, 0:2 hesablı nəticə təkcə rəqəmsal məğlubiyyət yox, həm də struktur problemi kimi dəyərləndirilməlidir.

San Marino ilə qarşılaşma: Reaksiyanın göstəricisi

San Marino ilə oyun isə fərqli ssenari ilə başladı. Rəqib 8-ci dəqiqədə hesabı açsa da, Azərbaycan millisi oyunu nəzarətə götürərək, daha aktiv və hücumameyilli görüntü sərgilədi. 27-ci dəqiqədə bərabərlik qolunu vuran komanda fasilədən sonra üstünlüyünü artırdı və nəticədə 2:1 hesablı qələbə qazandı.

Bu oyun komandanın hesabda geri düşdükdən sonra reaksiyasının olduğunu göstərsə də, başlanğıcdan sabit oynamamaq problemi yenə üzə çıxdı.

Sabit səviyyə problemi

Bu iki oyunu bir xətt üzrə təhlil etdikdə əsas nəticə dəyişmir: Azərbaycan millisində sabit performans problemi qalmaqdadır. Komanda zəif rəqiblərə qarşı nisbətən rahat oynasa da, Avropanın orta səviyyəli yığmaları qarşısında ritmini itirir.

Bu isə yalnız taktiki məsələ deyil, həm də mental dayanıqlılıq problemidir. Eyni temp və konsentrasiyanı 90 dəqiqə saxlamaq hələ mümkün görünmür.

Ayxan Abbasovun “tikinti mərhələsi”

Baş məşqçi Ayxan Abbasov üçün bu dövr nəticə qazanmaqdan çox, sistem qurmaq mərhələsidir. Oyun planı tam oturuşmayıb, ancaq ara-sıra sürətli keçidlər və cinahlardan istifadə kimi niyyətlər görünür. Amma bu modelin işləməsi üçün zaman, sabit heyət və oyunçular arasında anlaşma vacibdir. Milli komandada isə bu amillər həmişə dəyişkən olub.

Millətlər Liqası: Real gözlənti

UEFA Millətlər Liqasına real yanaşmaq lazımdır. Azərbaycan millisi üçün bu turnir asan yüksəliş yolu deyil, daha çox real səviyyənin ölçüldüyü platformadır. Komanda Malta kimi yığmalarla oyunlarda belə çətinlik yaşayırsa, daha güclü rəqiblərlə qarşılaşmalarda nəyəsə ümid etmək çətindir.

Ümid əsasən üç istiqamətdədir: müdafiə intizamının sabitləşməsi, hücumda lider oyunçuların formalaşması və komandanın sabitliyi. Çünki komandalar təkcə kollektiv oyunla yox, həm də fərdi keyfiyyətlərlə nəticə qazanır.

Qısası, Avstriya toplanışı nə tam inam, nə də inamsızlıq üçün əsas verir. Bu, daha çox “ara mərhələ”dir, axtarış dövrüdür. Azərbaycan millisi hələ öz sabit kimliyini tapmayıb. Əsas sual da budur: bu kimlik nə vaxt formalaşacaq və formalaşacaqmı?

Fəxri Rüstəmli