ÇL: “Slot ilk üç ayda yaxşı iş görüb”

“Bayer”in baş məşqçisi Xabi Alonso “Liverpul”a rəhbərlik edən niderlandlı mütəxəssis Arne Slot haqda danışıb.

Komanda.az “Liverpool Echo”-ya istinadən xəbər verir ki, ispaniyalı çalışdırıcı, Slotun yanaşmasının “Liverpul”un intensivliyinə uyğun olduğunu bildirib:

“Slotun yanaşması “Liverpul”un intensivliyinə uyğundur. O, ilk üç ayda yaxşı iş görüb. “Qırmızılar” Premyer Liqaya və Çempionlar Liqasına rəhbərlik edir. Bizim oyun planımız var, onun necə işlədiyini görəcəyik”.

Bu gün Leverkuzen “Bayer”i UEFA Çempionlar Liqasının 4-cü turu çərçivəsində “Liverpul”la qarşılaşacaq.

Xabi Alonso futbolçu karyerası ərzində “Liverpul”da çıxış edib və 2004/05 mövsümündə “qırmızılar”ın Çempionlar Liqasını qazanmasına köməyi dəyib.