İquayna təklif: Bizi seç, kapitanımız ol

İtaliyanın “Roma” klubu “Yuventus”un futbolçusunu heyətinə qatmaq istəyir.

Komanda.az İtaliya mətbuatına istinadən xəbər verir ki, “Çelsi” ilə icarə müqaviləsi bitdikdən sonra məxsus olduğu “Yuventus”a qayıdan Qonsalo İquayn “canavarlar”ın maraq dairəsindədir. Paytaxt klubu, 31 yaşlı futbolçunun təklifi qəbul edəcəyi halda, onu komandanın kapitanı edəcəyini də bildirib.

Buna baxmayaraq, İquaynın “Yuve”dən başqa, İtaliya klubunda çıxış etmək istəmədiyi deyilir.

Qış transfer pəncərəsi dövründə “Çelsi”yə icarəyə verilən 31 yaşlı futbolçu “zadəganlar”la Premyer Liqada 14 qarşılaşmada iştirak edib. İquayn bu oyunlarda 6 qola imza atıb.