“Norveç millisi dünya çempionatı yolunda çox əziyyət çəkib” – Solbakken

Futbol üzrə Norveç millisi dünya çempionatı yolunda çox əziyyət çəkib.

Komanda.az xəbər verir ki, bunu adıçəkilən yığmanın baş məşqçisi Stole Solbakken Kot-d’İvuar komandasına qarşı DÇ-2026-nın 1/16 final mərhələsinin oyunundan sonra deyib.

Mütəxəssis tarixi qələbədən sonra matçın son dəqiqələrində böyük emosional gərginlik yaşadığını, komandanın uğurunu isə bütün kollektivin zəhmətinin nəticəsi kimi qiymətləndirdiyini bildirib:

“Matçın sonlarına yaxın həm psixoloji, həm də emosional baxımdan böyük təzyiq hiss edirdim. Bu, mənimlə bağlı deyil. Söhbət futbolçulardan, məşqçilər korpusundan və uzun müddətdir bu komanda üçün çalışan hər kəsdən gedir. Onların həm çəkdiyi əziyyəti, həm də yaşadığı sevinci görəndə istər-istəməz duyğulanırsan. Dünya çempionatı yolunda həqiqətən çox əziyyət çəkmişik.

Oyundan sonra ilk olaraq ailəmin yanına getdim. Onların da nələr hiss etdiyini yaxşı bilirəm. Hələlik Braziliya ilə oyun barədə heç düşünməmişəm”.

Kot-d’İvuar seçməsinə 2:1 hesabı ilə qalib gələn Norveç 1/8 finala yüksəlib.