Azərbaycan klublarının UEFA reytinqindəki mövqeləri məlum olub

Azərbaycan klublarının UEFA reytinqindəki mövqeləri açıqlanıb.

Komanda.az xəbər verir ki, avrokuboklarda pley-off mərhələsinin oyunları müəyyən yerdəyişmələrə səbəb olub.

Son 5 mövsümdə toplanan əmsalların cəminə əsasən tərtib edilən siyahıda ən yüksək reytinqli Azərbaycan klubu “Qarabağ”dır. “Köhlən atlar” UEFA Avropa Liqasının pley-offunda Sloveniya “Olimpiya”sını 2:0 hesabı ilə məğlub etsə də, bunun mövqeyinə təsiri olmayıb. Qurban Qurbanovun yetirmələri 24.500 xalla 62-ci yerdədirlər. “Qarabağ” reytinqdə “Molde” (Norveç), “Fənərbaxça” (Türkiyə), PAOK (Yunanıstan) və “Makkabi” (Təl-Əviv, İsrail) ilə bu pilləni bölüşdürür.

“Qarabağ”dan sonra ən yaxşı göstəriciyə malik Azərbaycan klubu “Neftçi”dir. 10.000 əmsalı olan “ağ-qaralar” 4 komanda ilə birlikdə 135-ci pilləni bölüşdürür. Adrian Mutunun komandası da yerində qalıb.

“Qəbələ” isə növbəti dəfə geriləyib. “Qırmızı-qaralar” 4.500 xalla 270-cidirlər.

Azərbaycan çempionatının digər iştirakçılarından “Sabah”, “Zirə”, “Sumqayıt”, “Səbail” və elitanı tərk edən “Şamaxı” 3,350 xalla 334-cü pilləni bölüşdürürlər.

“Turan Tovuz”, “Kəpəz” və yenidən elitaya qayıdan “Araz-Naxçıvan” 424 klub sırasına düşməyiblər.

Türkiyənin ən reytinqli komandası yenə “Başakşəhər”dir. İstanbul klubu 29.000 əmsalla 53-cü pillədə qərarlaşıb. “Qalatasaray” (26.500) 56-cı, “Fənərbaxça” (24.500) 62-ci, “Sivasspor” (16.500) 89-cu yerdədir. “Beşiktaş” və “Trabzonspor” (11.500 xalla 113-cü), “Adana Dəmirspor”, “Konyaspor”, “Alanyaspor” və “Yeni Malatyaspor” (hamısı 6.170 xalla 205-ci) ilk “100-lük”dən kənarda qalıblar.

Ukrayna “Şaxtyor”u yenə keçmiş SSRİ klubları arasında ən yaxşı göstəriciyə malik komandadır. Donetsklilər 57.000 xalla 22-ci yerdədirlər. Ukraynanın digər təmsilçisi Kiyev “Dinamo”su (26.500) 56-cıdır. Bu sıralamada ilk “üçlüy”ü “Qarabağ” qapayır.

UEFA reytinqinə İngiltərə təmsilçisi “Mançester Siti” (124.000) başçılıq edir. Almaniyanın “Bayern” klubu 120.000 əmsalla ikinci sırada yer alıb. İlk üçlüyü “Real” (106.000) qapayıb.