“Hər kəs Seneqal millisinin Afrikanın haqlı çempionu olduğunu bilir”

Seneqal millisinin sabiq hücumçusu El Haci Diuf komandanın 2026-cı il Afrika Millətlər Kubokunu qazanacağına inanır. Seneqal Futbol Federasiyası Afrika Futbol Konfederasiyasının Afrika Millətlər Kuboku titulunu Mərakeş millisinə vermək qərarından İdman Arbitraj Məhkəməsinə (CAS) apellyasiya şikayəti verib.

Komanda.az xarici KİV-ə istinadən xəbər verir ki, sabiq futbolçu məsələ ilə bağlı bunu deyib:

“Hər kəs kimi mən də şoka düşdüm, amma inanıram ki, tezliklə hər şey normallaşacaq. Biz İdman Arbitraj Məhkəməsinə etibar edirik və əlverişli nəticəyə əminik. Meydanda qalib gəldiyimizə əminik və əsas məsələ budur. Və bizi dəstəkləyən bütün ölkələrə, bütün insanlara təşəkkür etmək istərdim. İnanıram ki, hər kəs Seneqal millisinin Afrikanın haqlı çempionu olduğunu bilir və başa düşür”.

2026-cı il yanvarın 18-də, Rabatda Mərakeşlə keçirilən final matçında seneqallılar qapılarına təyin olunan penaltiyə etiraz olaraq meydanı tərk etmişdilər. Təxminən 15 dəqiqəlik fasilədən sonra geri qayıdan komandanın qapıçısı Eduard Mendinin sayəsində penaltini dəf etmiş, əlavə vaxtda isə Pape Quyenin qolu ilə 1:0 hesablı qələbə qazanmışdılar.