Yubiley heç-heçəsi

Azərbaycan kubokunun 1/4 final mərhələsinin ilk oyunları çərçivəsində baş tutan “Səbail”lə səfər qarşılaşması “Zirə”nin tarixinə 50-ci heç-heçə kimi düşüb.

Komanda.az “qartallar”ın “facebook” səhifəsinə istinadən xəbər verir ki, bunadək 183 matçda 49 dəfə “sülh”ə imza atan “Zirə” yubiley bərabərliyinə nail olub. Bunlardan 40-ı Premyer Liqa, 6-sı birinci divizion, 3-ü Azərbaycan kuboku, 1-i UEFA Avropa Liqasına təsadüf edib.

“ASCO Arena”da qeydə alınan 0:0 hesablı nəticə komandanın 26-cı səfər heç-heçəsidir. Digər 24 belə nəticə isə evdə qeydə alınıb.

“Zirə” 4 müxtəlif hesabla heç-heçə oynayıb. “Qartallar”ın oyunlarında 23 dəfə 1:1, 18 dəfə 0:0, 8 dəfə 2:2, 1 dəfə 3:3 hesabına təsadüf olunub.

“Zirə”nin tarixində ilk heç-heçə 2014-cü il sentyabrın 12-də baş tutub. Birinci divizionun “Neftçala” ilə səfər qarşılaşmasında hesab açılmayıb.