“Zirə”dən rekord göstərici

“Zirə” Azərbaycan kubokunda ardıcıl 3-cü “quru oyun”unu keçirib.

Komanda.az xəbər verir ki, “qartallar” 2019/20 mövsümündə qol buraxmayıb. 1/8 finalda “Qaradağ-Lökbatan”a 4:0 hesabı ilə qalib gələn komanda 1/4 finalda “Səbail”lə səfərdə qolsuz heç-heçə edib, evdə əlavə vaxtdakı qolla qələbə qazanıb – 1:0. Hər üç matçı əvəzolunmadan keçirən Orxan Sadıqlı kubokdakı 300 dəqiqədə qapısını toxunulmaz saxlayıb.

Kubokda ardıcıl 3 “quru oyun” keçirən “Zirə” bu göstəricidə klub tarixinin rekorduna imza atıb. Bunadək komanda heç vaxt ardıcıl üç görüşdə qapısını toxunulmaz saxlamayıb.

“Zirə”nin kubokdakı məğlubiyyətsizlik seriyası da klub rekordudur. Ardıcıl iki mövsümdür uduzmayan komanda, sonuncu dəfə 2017/18 mövsümündə məğlub olub. “Qartallar” ötən turnirdə “Səbail” (1:0, 3:2), “Sumqayıt” (0:0, 3:3), cari turnirdə “Qaradağ-Lökbatan” (4:0) və “Səbail”lə (0:0, 1:0) oyunlarda uduzmayıb.