Yüksək Liqada və Super Liqada növbəti oyunların vaxtı açıqlandı

Kişilər və qadınlar arasında keçirilən Azərbaycan çempionatlarında növbəti oyunların başlama yeri və vaxtı dəqiqləşib.

Komanda.az xəbər verir ki, kişi voleybolçular arasında Yüksək Liqada 3-cü dövrənin son oyunları aprelin 4-də olacaq.

15-ci turun ilk qarşılaşmasında “Neftçi” “Murov”u (saat 15:00) sınağa çəkəcək. Ardınca “Sərhədçi” – MOİK (saat 17:00) oyunu baş tutacaq. Hər iki görüş “Sərhədçi” İdman Olimpiya Mərkəzində təşkil olunacaq.

Aprelin 5-də isə qadın voleybolçular arasında Super Liqada 4-cü dövrə oyunlarına start veriləcək. Azərbaycan Voleybol Federasiyasının idman zalında keçiriləcək 5-ci turun ilk matçı saat 16:00-da “Murov” və “Azərreyl” komandaları arasında olacaq. Bu qarşılaşmadan 2 saat sonra UNEC – “Abşeron” duelinə start veriləcək.