“Yaxşı heyət formalaşdırmaq üçün pul lazımdır” – Ten Haq

“Mançester Yunayted”in baş məşqçisi Erik ten Haq klubun transfer büdcəsindən söz açıb.

Komanda.az “The Guardian”-a istinadən xəbər verir ki, o, bu məsələlərdə heç bir təsirinin olmadığını bildirib:

“Bu məsələlərə mənim heç bir təsirim yoxdur. Tək bildiyim odur ki, “Mançester Yunayted” dünyanın ən böyük klublarından biridir. Azarkeş sayına görə isə 2-3 böyük klubdan biridir.

Bu klub əsas kuboklar uğrunda mübarizə aparmalıdır. UEFA Çempionlar Liqası, İngiltərə Premyer Liqası və s. Yaxşı heyət formalaşdırmaq üçün pul lazımdır. Çünki qazanılacaq uğur oyunçuların səviyyəsindən asılıdır. Hamı bilir ki, yüksək səviyyəli futbolçular çox bahadır.

Veriləcək qərarların tez bir zamanda dəqiqləşməsini istəyirəm. Lakin bu, məndən asılı deyil. Klubun sahibləri var, qərarları da onlar verir. Mən bütün diqqətimi təsir edə biləcəyim məsələlərə yönəldirəm: məsələn, komandanı təkmilləşdirmək, onu inkişaf etdirmək”.

Öncədən Qətər Şeyxi Həməd bin Casim bin Cabir Əl Taninin “Mançester Yunayted” üçün 5 milyard funt-sterlinqdən çox pul təklif etdiyi haqda xəbər vermişdik.

“Qırmızı şeytanlar” hazırda İngiltərə çempionatının turnir cədvəlində 63 xalla dördüncüdür.