“Vüqar Həşimov dünya şahmat tarixində həmişə xatırlanacaq” – Turnirin qalibi

“Vüqar Həşimov dünya şahmat tarixində həmişə xatırlanacaq. Onun qazandığı uğurlar bu fikri söyləməyə əsas verir”.

Komanda.az xəbər verir ki, bunu “Vüqar Həşimov Memorialı-2022”nin qalibi olan Özbəkistan şahmatçı Nodirbek Abdusattorov turnirin mətbuat xidmətinə açıqlamasında deyib.

O, Vüqar Həşimovun təkcə Azərbaycanda deyil, dünya şahmat tarixində özünəməxsus yeri olduğunu dilə gətirib:

“Bu gün də gənc şahmatçılar onun möhtəşəm partiyalarını izləyir və xüsusi oyun üslubundan yararlanırlar”.

Abdusattorov Azərbaycana səfər edəndə superturnirin qalibi olacağına inanmayıb:

“Çünki memorialda ən güclü şahmatçılar mübarizə aparırdı. Mükafatçılar sırasında yer almağı çox arzulayırdım. Sevinirəm ki, bunu bacardım”.

Azərbaycana ilk dəfə səfər etdiyini deyən şahmatçı yarışa kökləndiyini vurğulayıb:

“Çox gərgin və maraqlı partiyalarımız oldu. Elit şahmatçılarla birlikdə bu memorialda mübarizə aparmaq mənim üçün qürurvericidir. Rəqiblərimin hamısı titullu idmançılar idi. Turnir, həmçinin mənim üçün böyük təcrübə oldu”.