Tahir Gözəl: “Bu barədə baş məşqçi ilə fikir ayrılığımız yoxdur”

“Qarabağ”ın prezidenti Tahir Gözəl Premyer Liqada 2021/22 mövsümünün medalçılarının mükafatlandırma mərasimindən sonra jurnalistlərə açıqlama verib.

Komanda.az xəbər verir ki, o, növbəti çempionluqla bağlı bunları söyləyib:

“Bu, doqquzuncu çempionluğumuzdur. Çox sevincliyəm. “Neftçi”yə qarşı bugünkü oyunu yoxlama matçı kimi görürdüm. Nəticə elə də fərq etməyəcəkdi. Bir az həyəcan da var idi”.

Tahir Gözəl “Qarabağ”ın şəhid azarkeşi Məhəmmədəli İbrahimlinin atası ilə tanışlığı özü üçün mənəvi hadisə adlandırıb: “Onun gözündəki müqəddəs işıq mənə təsir etdi. Həm sevincliyəm, həm də onun kədərini bölüşdüm. Çox unudulmaz gün yaşadım. Gözəl bir insanla tanış oldum”.

Klub prezidenti avrokuboklara vəsiqə qazanan komandaların turnirə ciddi hazırlaşmalı olduqlarını söyləyib: “Hamısı bizimdir. Rəşad Sadıqov bizə doğmadır. “Zirə”yə uğurlar arzu edirəm. Bütün komandaları təbrik edirəm”.

Tahir Gözəlin sözlərinə görə, bu çempionluğun xüsusi yeri var: “Komandamız avrokuboklarda oynamaqla təcrübə toplayır. Biz bunu hiss edirik. “Qarabağ”ın ləzzətli oyun tərzi var. Qurban hocanın illərdir çəkdiyi zəhmətlə bu dəsti-xətt yaranıb. Biz bunu adi oyun elementlərində də görürük. Komandanın oyunu mənə ləzzət edir”.

Funksioner növbəti mövsümdə 10-cu çempionluğu qazanıb, 2-ci ulduzu komandanın formasında görməyi arzuladığını vurğulayıb: “Həmçinin, Çempionlar Liqasında növbəti dəfə qruplara qalmağımızı istərdim. Ümid edirəm ki, gələn mövsüm iki tarixi hadisəyə şahidlik edəcəyik”.

Tahir Gözəl transfer siyasətinə də toxunub: “Baş məşqçi ilə danışmışıq. Bəzi futbolçular getmək istəyir. Onların məsələsini müzakirə etdik. Komandanın özəyini qorumağa çalışırıq. Qurban hoca dedi ki, 2 ad üzərində işləyirlər, hazır olanda mənə təqdim edəcək. Bu barədə fikir ayrılığımız yoxdur. Klub olaraq, onun istəklərinə cavab verməyə hazırıq”.