Ronaldo, yoxsa Messi? – Professorun mübahisəli iddiası

Pele, Dieqo Maradona, Kriştiano Ronaldo, Lionel Messi… Onlar bütün zamanların ən yaxşı futbolçusu adına əsas namizədlərdir. İndiyə qədər bununla bağlı xeyli müzakirə, müqayisə aparılıb. Xüsusən də, Ronaldo ilə Messi arasında. Komanda.az xəbər verir ki, Oksford professorunun iddiası yeni müzakirəyə rəvac verib.

Ən yaxşı üçün 7 kriteriya

Oksfordun riyaziyyat üzrə professoru Dr. Tom Krouford bütün zamanlarda dünyanın ən yaxşı futbolçusunu müəyyənləşdirmək üçün xüsusi indeks tərtib edib. Onun versiyasına əsasən, portuqal futbolçu 100 faiz dəyər qazanıb. İlk beşlikdə Pele, Ferents Puşkaş, Messi və Ronaldo Nazario da yer alıb. Ronaldonun ən yaxşı olması 7 kriteriya əsasında müəyyən edilib: klub rekordları, klub titulları, beynəlxalq titullar, “qızıl top”, fərdi mükafatlar, son 5 mövsümdə “X faktoru” əsasında futbolçunun statistik göstəriciləri və komandasının qələbəsinə verdiyi töhfə.

Klub titulları Messidə çoxdur

Ancaq professorun qiymətləndirməsi birmənalı qəbul edilmir. Bir çoxu iddia edir ki, Lionel Messi Ronaldodan daha üstündür. Onların da bəlli arqumentləri var. Bu arqumentlərdən bir neçəsinə diqqət edək. Ronaldo karyerası ərzində bütün turnirlərdə 1122 oyun keçirib, 815 qol vurub. Messi isə 974 qarşılaşmada 769 dəfə fərqlənib. Klub titullarına gəldikdə, PSJ-in futbolçusu daha zəngindir. Düzdür, Ronaldonun Çempionlar Liqasında bir qələbəsi çoxdur. Üstəlik, o, 3 ölkədə çempion olmağı bacarıb.

Beynəlxalq göstəricidə isə…

Beynəlxalq göstəricidə isə portuqal ulduz rəqibindən bir baş üstündür. O, bütün dövrlərdə yığma komandada ən çox qol vuran oyunçudur. Ronaldo bu göstəriciyə ötən il nail olub. Həm Ronaldo, həm də Messi öz qitələrində ən yüksək mükafata sahib çıxıblar. Messi Argentina yığması ilə Amerika, Ronaldo isə Portuqaliya millisi ilə Avropa çempionu olub. Fərdi mükafatlarda Messinin üstünlüyü var. O, “qızıl top”u 7 dəfə qazanıb. Ronaldonun arxivində isə bu mükafatdan 5-i var. “X faktoru” indeksinə görə də hər iki futbolçu yüksək göstəriciyə sahibdir. Ancaq professor Tom Krouford üstünlüyü Kriştianoya verib.

Mübahisə etmək olar, amma…

Obyektiv nəticədir? Birmənalı fikir bildirmək çox çətindir. Professorla ciddi mübahisə etmək olar, Özü də tutarlı faktlarla. Amma bütün hallarda, dünyada milyonlarla pərəstişkarı olan bu iki nəhəng futbolçudan kimin ən yaxşı olduğunu müəyyən etmək asan deyil. Böyük ehtimalla, “kim ən yaxşıdır, Ronaldo, yoxsa Messi” sualı hələ uzun illər, onlar karyeralarını bitirdikdən sonra da müzakirə və mübahisə mövzusu olacaq.

Bizi Telegramda izləyin