“Qəbələ” ilə oyunda qələbəyə layiq çıxış etdik”

Çexiyanın “Teplitse” komandasının baş məşqçisi Jiri Yaroşik Türkiyədə “Qəbələ”yə qarşı keçirdikləri yoxlama oyununu şərh edib.

Komanda.az xəbər verir ki, 46 yaşlı çexiyalı mütəxəssis 2:1 hesabı ilə qalib gəldikləri görüşdə oyunçularının performansından razılıq bildirib:

“Qəbələ” ilə oyunda qələbəyə layiq çıxış etdik. Yüksək səviyyədə olan meydançada güclü rəqiblə qarşılaşdıq. Qələbəni yüksək qiymətləndirirəm. Matçın əvvəllərində buraxdığımız axmaq qolu nəzərə almasaq, qələbəyə layiq idik”.

Bu gün Azərbaycana qayıdacaq “Qəbələ” Antalya toplanışında 3 yoxlama görüşü keçirib. Elmar Baxşıyevin yetirmələri ilk iki matçında Rumıniyanın “Sepsi” komandası ilə bərabərə (2:2) qalıb, Almaniya təmsilçisi “Lukenvalde”yə qalib (3:2) gəlib.