“Çox vacib oyuna çıxırıq” – Qurban Qurbanov

“Qarabağ” sabah UEFA Çempionlar Liqasının 3-cü təsnifat mərhələsində Bolqarıstanın “Ludoqorets” klubu ilə qarşılaşacaq.

Komanda.az xəbər verir ki, bu gün Ağdam klubunun baş məşqçisi Qurban Qurbanovun mətbuat konfransı keçirilib.
Qurbanov ümumi olaraq hazırlıqlarından razı qalmadığını bildirib:

“Düşünürəm ki, çox vacib oyuna çıxırıq. Yaxşı oyun gözləyirəm. Futbolçularının individual keyfiyyətləri yüksək olan komandaya qarşı oynayacağıq. Çempionatın başlamasıyla əlaqədər komandam qruplara bölündü. Ümumi olaraq hazırlığımızdan o qədər razı qalmamışam.

Sabah azarkeşlərimizin qarşısında oyunacağıq. Futbolçularım bunu dərk edirlər. Oyunun vacibliyini anlayırıq.Yaxşı futbol göstərməyə çalışacağıq.

Elvin Cəfərquliyevin qırmızı vərəqəsini çox da müzakirə etmək istəməzdim. Bəli, hər bir oyunçu meydandakı hərəkətlərinə fikir verməlidir. Bəzən belə amillərin, epizodların bizə xeyri olur. Çünki bəzi futbolçulara bu bir növ siqnal olur, hansı ki, meydanda daha düzgün qərarlar versinlər. Elvinin kifayət qədər təcrübəsi var. Özü də başa düşür ki, belə hallar təkrarlanmasın. Hakimlər də bəzən epizoda tələsik qərar verirlər. Bunu dəfələrlə hakimlərə də demişəm. Onlar isə oyunçuları qoruduqlarını söyləyirlər. Yenə də, hər bir halda problem gəlib futbolçunun üzərinə düşür.

Həmişə istənilən püşkatmaya normal yanaşmışam. Çempionlar Liqasına gələn hər bir komanda öz ölkəsinin çempionudur. İndiyə qədər bu dərəcədə təcrübəli komandaya qarşı oynamamışıq. Çox keyfiyyətli oyunçuları var. Matça ciddi yanaşırıq.

Mərc kontorlarının bizi favorit göstərməsinə normal baxıram. Ama bu o demək deyil ki, biz üstünük. Bu o demək deyil ki, biz rəqibə ciddi yanaşmırıq. Bəli, bizə böyük diqqət ayırırlar. Bizə qarşı rəqiblər çox ciddi hazırlaşırlar. Bu bir tərəfdən bizə çətinlik yaratsa da, digər baxımdan yaxşıdır ki, matçlara daha ciddi hazırlaşmağımıza əlavə motivasiya olur.

Yeni futbolçu gəlməli idi, amma gələsi olmadı (gülür)”.

“Qarabağ” – “Ludoqorets” matçı avqustun 6-da Tofiq Bəhramov adına Respublika stadionunda keçiriləcək. Qarşılaşmanın start fiti saat 20:00-da səslənəcək.

Fəxri Rüstəmli