Qurban Qurbanov: “İnanıram ki, futbolçular bunu bacaracaqlar”

“Qarabağ”ın baş məşqçisi Qurban Qurbanov Avropa Liqasının qrup mərhələsinin 2-ci turu çərçivəsində İsveçdə yerli “Hakken”ə qarşı keçirəcəkləri oyundan əvvəl fikirlərini bölüşüb.

Komanda.az xəbər verir ki, 51 yaşlı mütəxəssis bu gün baş tutan mətbuat konfransında sabahkı görüşün hər iki komanda üçün vacib qarşılaşma olduğunu bildirib:

“Bu görüşdə üç xal qazanmaq istəyirik. Amma bir xal da bizə sərf edəcək. Rəqibin özünəməxsus oyun üslubu var. Onlara qarşı həddindən artıq diqqətli olmalıyıq. İnanıram ki, futbolçular bunu bacaracaqlar. Nəticə üçün meydanda ən yaxşısını etməyə çalışacağıq”.

Qurbanov matçda baş verə biləcək mümkün təxribata da toxunub: “Dəfələrlə bunun şahidi olmuşuq. Futbolçularla daim bu yöndə söhbətimiz olur. Çünki Azərbaycanı təmsil edirik və klub olaraq özümüzü intizamlı aparmaq istəyirik. Bu o demək deyil ki, kimdənsə qorxuruq və ya çəkinirik. Sadəcə, idman prinsiplərinə uyğun davranmağa və ölkəmizi layiqincə təmsil etməyə çalışırıq. Meydanda və kənardakı davranışımız çox vacibdir. Lazım olanda təxribatlara öz reaksiyalarımızı da veririk”.

İsveçli jurnalistlərdən biri çalışdırıcıya “Ermənilər hazırda “Qarabağ”ı tərk edir, bu sizə təsir edir” sualını verib. Qurbanov onun sualına belə cavab verib:

“Hamı bilirdi ki, biz öz torpaqlarımızda rahat yaşaya bilmirdik. Bu gün ordakı insanlar öz doğma ölkələrinə gedirlər. Azərbaycanlılar öz doğma torpaqlarına qayıdırlar. Digər ölkənin nümayəndələrini çox yaxşı yola salırlar. Rahat şəkildə onlara şərait yaradılır, kömək edilir. Hamı bilir ki, biz özümüzü daha yaxşı hiss edirik, çünki torpaqlarımız qayıdıb. “Qarabağ” Azərbaycandır, Azərbaycanın olub”.

Oktyabrın 5-də oynanılacaq qarşılaşma saat 23:00-da başlayacaq.