Qurban Qurbanov: “İlk oyunun hesabı bizi aldatmamalıdır”

“Qarabağ”ın baş məşqçisi Qurban Qurbanov Portuqaliyanın “Braqa” klubuna qarşı keçiriləcək UEFA Avropa Liqasının pley-off mərhələsinin cavab oyunu ərəfəsində mətbuat konfransında iştirak edib.

Komanda.az xəbər verir ki, Qurbanov ilk oyunda səfərdə 4:2 hesablı qələbə qazanmalarına baxmayaraq, ehtiyatı əldən verməyəcəklərini bildirib:

“İlk oyunun hesabı bizi aldatmamalıdır. Çox vacib, dəyərli oyundur. Bu matç ətrafında çox danışmaq istəmirəm. Fikrimizi tam rəqibə yönəltmişik. Cavab qarşılaşmasında daha intizamlı oynamalıyıq. İnanıram ki, futbolçularımız soyuqqanlı olacaq və düzgün oynayacaqlar. Oyunu yaxşı notda başa vurmaq istəyirik. Şans varsa, bundan istifadə etməyə çalışacağıq.

“Braqa” ciddi rəqibdir. Çox güclü futbolçuları var. Sürətli hücum edirlər. Bizdən daha təcrübəlidirlər. İllərdir avrokuboklarda mübarizə aparırlar. Onların gücünü bilirik. İnanmıram bizim üzərimizdə psixoloji üstünlük qursunlar.

Avrokuboklarda hər uğur Azərbaycan futbolu üçün çox önəmlidir. Bu cür qalibiyətlər futbolçuların inamı üçün çox vacibdir. Çox istərdik ki, bunu böyük uğur adlandıraq. Azarkeşlərin bu cür oyunlara köklənməsi məni sevindirir. Hər il bir addım irəli gedəndə daha da həvəslənirik. Dövlət orqanlarının da bu cür matçlara marağı artır. Mən hər zaman istəmişəm bura böyük komandalar gəlsin. Amma bununla kifayətlənə bilmərik. Daha da öz üzərimizdə işləməliyik. Sabah məğlub olsaq belə, bunu uğursuzluq kimi saya bilmərik”.

Fevralın 22-də keçiriləcək “Qarabağ” – “Braqa” oyunu saat 21:45-də başlayacaq.

Akif Əhmədov