Qurban Qurbanov: “Bayer”ə qarşı oynamaq çox xoşdur”

“Qarabağ”ın Qurban Qurbanov Avropa Liqasının 1/8 final mərhələsində Almaniya “Bayer”inə qarşı keçirəcəkləri ilk oyundan əvvəl mətbuat konfransında iştirak edib.

Komanda.az xəbər verir ki, Qurbanov bu matçın çox vacib oyun olduğunu bildirib:

“Həqiqətən çox vacib oyundur. Bizə çox böyük dəstək var. Böyük bir futbol ab-havası var şəhərdə. Bu komandaya qarşı oynamaq çox xoşdur. “Bayer” bu gün Bundesliqanın lideridir. Belə klublardan oyun baxımından böyük təcrübə yığırıq.

Oyuna yaxşı hazırlaşmışıq. Oyunçular da bilirlər ki, çox sürətli komandaya qarşı oynayacağıq. İnanıram ki, sabah stadion tam dolacaq. Yaxşı oyun göstərməyə çalışacağıq”.

Qurban Qurbanov Türkiyə xalqına ona dəstək olduqları üçün təşəkkür edib:

“Daim bu ölkənin futbolunu izləmişik. Diqqət mərkəzində olmaq bizə əlavə güc verir. Həmişə Türkiyə azarkeşlərini görürük. Bizim yanımızda olublar. “Qarabağ”ı dəstəkləyən qardaşlarımız var. Çəkinəcəyimiz bir şey qalmır”.

Akif Əhmədov