“Prinsiplərimizdən əl çəkmək barədə düşünmürük” – Qurban Qurbanov

“Qarabağ”ın baş məşqçisi Qurban Qurbanov Çempionlar Liqasının 2-ci təsnifat mərhələsinin “Rakuv”la cavab qarşılaşmasından öncə mətbuat konfransında iştirak edib.

Komanda.az xəbər verir ki, o, Bakı Olimpiya Stadionunda baş tutacaq görüşdən öncə futbolçuları ilə müzakirələr apardıqlarını söyləyib:

“Qonaqlarımızı salamlayıram! Bakı şəhərinə xoş gəliblər!

Bizim üçün vacib oyundur. İntizamlı komandaya qarşı oynayacağıq. Üstünlük rəqib tərəfdə olsa da, cavab oyununa pis hazırlaşmamışıq. Futbolçularım oyunun gedişatında rəqib komandaya qarşı diqqətsizlik etməməlidirlər. Onlarla çoxlu müzakirələr aparmışıq. Çalışacağıq ki, sabah ən yaxşı oyunlarımızdan birini sərgiləyək.

Bəli, mətbuatda gedən son yazılardan məlumatım var. Sabah üçün start heyət hələlik bəlli deyil. Şahruddin Məhəmmədəliyevin oynamaq şansı var. Fikrimiz, diqqətimiz yalnız rəqibdə olmalıdır. Oyundan kənara çıxmalı deyilik. Səhvlərdən uzaq olmağa çalışmalıyıq. Xüsusilə də, qapıçılarımız diqqətli olmalıdırlar. Juninyonun durumu normaldır. Məşqlərdə iştirak edib.

Hər matçdan sonra rəqib haqda fikirlər səsləndirirəm. Yenə də deyirəm: rəqibi artıq yaxşı tanıyırıq. Onların yaxşı səviyyədə olduqlarını gördük. Sabahkı oyunda bir saniyə belə olsun diqqətsizliyə yol verməməliyik. “Rakuv” böyük uğurlara imza atan klubdur. İldən-ilə yaxşı nəticələr əldə etməyi bacarıblar. Onların çox ciddi rəqib olması ilə bağlı qənaətə gəlmişəm.

“Rakuv”da klub olaraq yaxşı iş qurulub. Hansısa məşqçi oranı tərk etsə də, prinsipləri olduğu kimi qalacaq. Onlarla qışda da oynamışdıq. Bu gün onlar daha inamlıdırlar. Təcrübələri xeyli artıb. Baş məşqçiləri futbolun içində böyüyüb. Məsuliyyətli biridir. Müdafiə xətlərinin zəif olduğunu heç də deməzdim. Futbolçularım səfərdə qol şanslarından istifadə edib fərqlənə bildilər.

Oyunçularımın fərdi ustalığı yaxşı nəticə üçün bizə kömək edə bilər. Prinsiplərimizdən əl çəkmək barədə düşünmürük. İndiyə qədər qazandığımız uğurların əsas cəhətlərindən biri budur”.

Xatırladaq ki, ilk qarşılaşma Polşa təmsilçisinin 3:2 hesablı qələbəsi ilə yekunlaşıb.

Rövşən Əlisoy