“O, “Real”da oynamaq üçün yaradılmış futbolçudur” – Fabreqas

Fransanın “Monako” klubunun yarımmüdafiəçisi Sesk Fabreqas açıqlama verib.

Komanda.az İspaniya mətbuatına istinadən xəbər verir ki, 32 yaşlı futbolçu, Eden Hazardın “Real”a və Antuan Qrizmannın “Barselona”ya keçidi haqqında danışıb:

“Hazard oyunda fərq yaratmağı bacaran inanılmaz futbolçudur. O, “Real”da oynamaq üçün yaradılmış futbolçudur. Çünki onun meydanda daha çox boş əraziyə ehtiyacı olur. O, topa sahib olmağı və nəzarət etməyi sevir. Məsələn, “Barselona”da hər şey kəskindir. Hər bir futbolçu topu digərinə ötürmək üçün öz yerində olmalıdır. Hazard isə meydanda sərbəstliyi sevir.

Mənim üçün Qrizmannın “Barselona”ya keçidi sürpriz oldu. O, “Atletiko” ilə müqavilə imzaladı və bu klubla böyük işlər görmək istədiyi hiss olunurdu. Təbii ki, futbol dəyişir. Qrizmann hücumda vacib rol oynayan yaxşı futbolçu olduğu üçün “Barselona” daha da güclü olacaq”.

İspan futbolçu, “Barselona”dakı karyerası haqqında da danışıb:

“32 yaşın olarkən, İspaniyaya qayıtmaq barədə düşünmək çətindir. “Barselona”da oynamağı arzulayırdım və üç il bunu etdim. Bu müddətdə çoxlu titullar qazandım və çox xoşbəxt oldum. İspaniyaya qayıtmağım və yenidən orda oynamağım üçün çox hadisələr baş verməlidir”.

Fabreqas 2011-2014-cü illərdə “Barselona”nın şərəfini qoruyub.