“Messinin “Barselona”ya qayıtması heyrətamiz olardı” – Deku

“Barselona”nın idman direktoru Deku argentinalı hücumçu Lionel Messinin “İnter Mayami”yə keçidi haqda danışıb.

Komanda.az “Marca”-ya istinadən xəbər verir ki, o, ABŞ klubuna transferin uzun müddət planlaşdırıldığını deyib:

“Mən Messi ilə əvvəldən dost olmuşam. Onun ABŞ-a köçməsi məsələsi çoxdan planlaşdırılırdı. O, uzun müddət idi ki, bu məsələ haqqında danışırdı. Mən danışıqlarda iştirak etməmişəm. Aydındır ki, Messi “Barselona” tarixinin ən böyük oyunçularından biridir. O, indi xoşbəxtdir və məncə, karyerasında buna nail olmalı idi.

Messinin “Barselona”ya qayıtması heyrətamiz olardı, çünki o, tarixin ən yaxşı oyunçusudur. Amma hər şey belə oldu və onun xoşbəxt olduğunu görmək ən vacib şeydir”.

36 yaşlı argentinalı hücumçu 2023-cü ilin iyulunda azad agent kimi PSJ-dən “İnter Mayami”yə keçib.