Klopp: “Çelsi” bir xala layiq idi”

“Liverpul”un baş məşqçisi Yurgen Klopp Premyer Liqanın 3-cü turunda “Çelsi”yə qarşı keçirdikləri oyunu (1:1) şərh edib.

Komanda.az xəbər verir ki, Klopp, nəticənin ədalətli olduğunu deyib:

“Oyun çətin keçdi. İlk hissədə yaxşı oynadıq. “Çelsi” ilk qol imkanından yararlana bildi. İlk hissənin sonunda layiq olduğumuz qolu vura bildik.

Azlıqda qalan rəqibə qarşı oynamağın asan olduğunu düşünürlər. Lakin belə deyil. Azlıqda qalan komanda daha çox müdafiəyə diqqət edir. Düzdür, say üstünlüyündən yararlana bilərdik, lakin olmadı. Uzaqdan yaxşı zərbələrimiz olsa da, rəqibin qapıçısı Eduard Mendi yaxşı qurtarışlar etdi.

Oyundakı intensivliyimizi bəyəndim. Azarkeşlərimiz də bizi möhtəşəm dəstəklədilər. Nəticənin ədalətli olduğunu düşünürəm. “Çelsi” bir xala layiq idi”.