“İnanıram ki, səfərdə istədiyimiz nəticəni əldə edəcəyik” – Qurban Qurbanov

Bu gün UEFA Çempionlar Liqasının 3-cü təsnifat mərhələsinin ilk oyununda “Qarabağ” Bolqarıstanın “Ludoqorets” klubu ilə qarşılaşıb.

Komanda.az xəbər verir ki, 1:2 hesabı ilə məğlub olan Ağdam komandasının çalışdırıcısı Qurban Qurbanovun oyundan sonra mətbuat konfransı keçirilib. Qurbanov cavab görüşünün daha fərqli olacağını bildirib:

“Bu ilk hissə idi. İnanıram ki, cavab görüşü daha fərqli olacaq. Məğlub olmuşuq, amma bu o demək deyil ki, hər şey bitdi. Əksinə, səfərdəki oyuna daha yaxşı hazırlaşıb, yaxşı nəticə əldə etməyə çalışacağıq. Futbolçularıma inanıram.

Fikirlər fərqli idi. Mən rəqibi ciddiyə almışdım. Bilirdim çətin olacaq. İnanıram ki, səfərdə istədiyimiz nəticəni əldə edəcəyik. Hakimin qərarlarından da hiss olunurdu ki, sanki rəqibə simpatiyası var idi.

Qapıçı mövqeyi ilə bağlı inanın ki, ciddi danışıqlar gedir. Buntiçin oyuna qoşulmalarını normal qəbul edirəm.

Bu rəqiblə qarşılaşmada çətinliyimiz ilk növbədə təcrübə ilə bağlı idi. Daha sonra fərdi keyfiyyətlərdə üstün idilər. Dediyim kimi, qarşıdakı oyunda daha səliqəli oynayıb, yaxşı nəticə ilə yolumuza davam edəcəyik”.

“Ludoqorets”lə “Qarabağ” arasında cavab qarşılaşması avqustun 13-də Bolqarıstanda keçiriləcək.

Fəxri Rüstəmli