Elmar Baxşıyev: “Qəbələ”nin təcrübəli oyunçulara ehtiyacı var”

“Qəbələ”nin baş məşqçisi Elmar Baxşıyevin “Sumqayıt”la qarşılaşdıqları yoxlama oyunundan sonra mətbuat konfransı keçirilib.

Komanda.az xəbər verir ki, Baxşıyev, 2:2 hesabıyla bitən görüşü belə şərh edib:

• Çətin durumdayıq. Biz də bilirik ki, çətin olacaq. Əsas tələbimiz, istəyimiz odur ki, futbolçular zədədən uzaq olsun. Onları bundan qorumaq lazımdır. Məşq proseslərini də elə qurmuşuq ki, komandanı zədədən qoruyaq. Nə qədər də çalışsaq, bu, qaçılmazdır. Bu oyunda da bəzi futbolçularımız zədə səbəbindən yox idi. Yenə də ümidliyik. Komanda olaraq yaxşısını etməyə çalışacağıq.
• Nəyə ümidlisiz? Komandanın yeni mövsümdə necə olacağı sual altındadır.
• Futbolsuz olmaq hamıya təsir edir. Amin Seydiyev hələ bizim futbolçudur. Mövsümün sonuna qədər də bizimlə olacaq. Amin yeni mövsümdə “Sabah”a keçəcək. İndiki durumda bu, çox önəmli deyil. Problemləri sadalasaq, gərək heç burda olmayaq. Biz əlimizi üzsək, burda olmağın da mənası yoxdur. Ümid edirəm ki, komanda yaşayacaq və biz də əlimizdən gələni edəcəyik.
• Komandanı psixoloji, yoxsa fiziki hazırlamaq çətin olacaq?
• Futbolçular uzun müddət kənarda qalıb. Onların psixologiyasını düzəltmək elə də problem olmaz. Görürük ki, onlara verilən tapşırıqları yerinə yetirməyə çalışırlar. Vaxt azlığımız var. Vaxt bizi sıxır və sıxılmış vaxtda istəyirik ki, daha optimal komanda yaradaq. Çempionat oyunları getdikcə komanda özünə gələcək.
• Ehtimallar var ki, “Qəbələ” elitada qalsa, yeni mövsümdə akademiyanın futbolçularına üstünlük verəcək. Bu, sizin üçün çətin olmayacaq?
• Hələ mövsüm bitməyib. Gələcəkdə nə olacağını zaman göstərəcək.
• Gələn mövsümdə baş məşqçi kimi qalıb işləyəcəksiz, ya gedəcəksiz?
• Bizim heyətimiz onsuz da gəncdir. Komandanın təcrübəli futbolçulara ehtiyacı var.
  
  Şahin Cəfərov