Çox ümidli idim ki, bəlkə o, bizə kömək edə bilər – Müsahibə

“Keşlə”nin baş məşqçisi Tərlan Əhmədov hazırlıq, keçirilən yoxlama matçları və transferlər barədə klubun mətbuat xidmətinə müsahibə verib.

Komanda.az xəbər verir ki, Əhmədov “Keşlə”nin Antalyadakı toplanışını dəyərləndirməklə yanaşı, transferlər haqda da danışıb:

– Tərlan müəllim, təlim-məşq toplanışının böyük hissəsi artıq arxada qalıb. Hazırlıq dövründə qarşısınıza hansı məqsədləri qoymuşduz və düşündüklərinizi həyata keçirə bildizmi?

– Toplanışda birinci məqsədimiz komandanın fiziki hazırlığını pik nöqtəyə çatdırmaqdan ibarət idi. Bundan sonra taktiki mərhələ başlayırdı. Bakı toplanışından sonra artıq 10-cu gündür Antalyada hazırlıqlarımızı davam etdiririk və Türkiyə hazırlığı çərçivəsində iki oyun keçirmişik. Taktiki məşqlər gedir və demək olar ki, istədiyimiz bəzi taktiki gedişləri, sistemdəki dəyişiklikləri həyata keçirdik. Bəzi səhvlər var idi ki, son iki yoxlama oyununda onlara daha çox diqqət ayırdıq və sonrakı məşqlərdə üzərində işləməyə başladıq. Ümumilikdə götürsək, komandanın 2-ci yoxlama matçında fiziki hazırlıq vəziyyəti qənaətbəxş idi və gördüyümüz iş müsbət istiqamətə doğru gedir. Bəzi taktiki məsələlər var ki, onların üzərində işlədik. Keçirdiyimiz son iki yoxlama matçında fərqli heyətlə və fərqli sistem və taktika ilə meydana çıxdıq. Ona görə ki, bizi çempionatımızda on dörd oyun gözləyir və bütün oyunların maraqlı, eyni zamanda, çətin olacağını düşünürük. Bu baxımdan son iki oyunda, ümumilikdə, gördüyümüz işlərdə taktiki və sistem dəyişikliklər üzərində çalışdıq. 

– Hava şəraiti məşqlərdə çətinlik yaratdımı? Bu məqam məşq planına necə təsir göstərdi?

– Söz yox, problem olur və oldu. İki günlük bizdə problem oldu, amma bu iki gün ardıcıl olmadı. Həmin günlərdən də səmərəli istifadə etdik, yəni bir gün sırf fitness məşqləri etdik. Digər problem yanvarın 22-də baş verdi. Ancaq həmin gündən də maksimum istifadə etməyə çalışdıq. Sadəcə, məşqin mahiyyətini dəyişdik, zamanı qısaltdıq və taktiki tapşırıqlar yox, tamamilə başqa tapışırıqlar üzərində işlədik. Hər halda vəziyyət nə bizdən, nə təşkilatçılardan asılıdır, bu, təbiət hadisəsidir və bu vəziyyətdən səmərəli istifadə etməliyik.

– Toplanış çərçivəsində keçirilmiş iki yoxlama matçı barədə təəssüratınız necədir?

– Açığı, deyim ki, ilk yoxlama matçında, komandada ağır yükləmələrdən sonra gedişatı hiss etmək olurdu. Öncə qeyd etdiyim kimi, hər iki oyuna fərqli sistem və taktika ilə meydana çıxmışdıq, çünki çempionatda bizi fərqli sistem və taktika ilə oynayan komandalarla oyunlar gözləyir. Baxmayaraq ki, komandamız birinci oyunda ağır yükləmələrdən sonra meydana çıxmışdı. Ancaq buna baxmayaraq, komandanın meydandakı hərəkətindən çox razı qaldım.

İkinci oyunda komanda ilk oyunla müqayisədə daha çox hərəkətli idi. Birinci hissədə komandadan istədiyim oyunu görmüşdüm, amma bəzi məqamlarda çatışmazlıq var idi ki, onlar da zamanla aradan götürüləcək. Qarşıda hələ iki yoxlama oyunu var. İkinci hissədə heyətdə 4-5 nəfər dəyişdikdən sonra sistemdə də dəyişiklik etdik ki, başqa sistem üzərində də çalışaq və sonda bu sistemdə bəzi çatışmazlıqlar ortaya çıxdı və onların üzərində işləməliyik. Ümumilikdə götürsək, komandada tərəqqi böyükdür. İlk və 2-ci yoxlama matçlarında böyük irəliləyiş var. Həm fiziki, həm komanda oyunu planında inkişaf var ki, bu da bizi çox sevindirir.

– Transferlər barədə nə deyə bilərsiz?

– Bilirsiz ki, bu günədək üç futbolçu ilə müqavilə imzalamışıq. İkisi yerli futbolçudur – Emin Mehdiyevi və Vüsal İsgəndərlini komandamızın heyətinə cəlb etmişik. Emin Mehdiyevi “Neftçi”də çıxış etdiyi zamandan tanıyıram. Onun oyununa bələdəm və azərbaycanlıdır, istəyirəm ki, bizə köməyi dəysin. Vüsal İsgəndərli də “Zirə”də çıxış edirdi və biz onu komandamıza dəvət etmişik. Üçüncü transferimiz legionerdir, Con Kamara, hansı ki, Qazaxıstanın “Kaysar” komandasında çıxış edirdi. Həmin mövqeyə bizə təklif edilən ən optimal oyunçu məhz Kamara idi. Məşqçilər korpusu onu komandaya dəvət etdi. İki əcnəbi futbolçu da cəlb oluna bilər. Ən çox da istədiyimiz pleymeykerdir, onun axtarışları davam edir. Bu məsələdə tələsmək də istəmirik, çünki həmin mövqeyə daha yaxşı futbolçu seçmək istəyirik. Yaxın günlərdə hansı futbolçunun komandaya cəlb olunacağı bilinəcək.

– Mergim Brahimi adlı futbolçu komandada baxışda oldu və ilk yoxlama matçında meydana da çıxdı. Bu məsələdə nə yenilik var?

– Onun çox yaxşı futbolçu kayrerası var. Yunanıstanda və İsveçrədə oynayıb, amma ümumilikdə götürsək, uzun zamandır futbol oynamır və çox ümidli idim ki, bəlkə o, bizə kömək edə bilər. Onun 6 ay futbol oynamaması mənim üçün problem yaradırdı. Amma hələ heç nə bitməyib, hələlik axtarışdayıq və hər zaman hər şey ola bilər. Çalışırıq ki, daha yaxşı futbolçunu cəlb edək. Brahimi haqqında mətbuatda bəzi məlumatlar yayılmışdı, onun kosovalı olduğu bildirilmişdi. Nəzərinizə çatdırmaq istəyirəm ki, o, kosova mənşəli İsveçrə vətəndaşıdır. Onun Albaniya və İsveçrə pasportu da var. Brahiminin əsli-kökü kosovalıdır və bunu şişirtməyə lüzum yoxdur. Onun bizim komandaya cəlb olunması məsələsi hələlik açıq qalır.