Ançelotti: “Oyunumuzda həzz aldığım bir çox məqamlar var”

“Real”ın baş məşqçisi Karlo Ançelotti komandasının Çempionlar Liqasında “Zalsburq” üzərindəki qələbəsindən (5:1) danışıb.

Komanda.az UEFA-nın mətbuat xidmətinə istinadən xəbər verir ki, italiyalı çalışdırıcı yaxşı formada olduqlarını düşündüyünü bildirib:

“Əsas məqsədimiz qələbə qazanmaq idi. Bəli, bir az passiv başladıq, amma bunu tez bir zamanda düzəltdik. Hücumumuzun səviyyəsini nəzərə alaraq, komandaya heç vaxt şübhə etməmişəm. Düşünürəm ki, yaxşı formadayıq, dinamika sevindiricidir. Buraxdığımız qola görə də üzülmürəm. Oyunumuzda həzz aldığım bir çox məqamlar var, xüsusən də, beşinci qol, sadəcə Valverdenin o gözəl hərəkətinə baxın.

David Alabanın qayıdışı? Hazırda hər şey ondan asılıdır. O, start heyətində meydana çıxmağa çox yaxındır, mən sadəcə ondan işarə gözləyirəm”.

Bu qələbə “Real”a turnir cədvəlində 16-cı pilləyə yüksəlməyə imkan verib.