Qvardioladan Kloppa cavab: “Bunlar həqiqətdən uzaq sözlərdir”

İngiltərənin “Mançester Siti” klubunun baş məşqçisi Pep Qvardiola “Liverpul”un çalışdırıcısı Yurgen Kloppun transferlərlə bağlı dediyi sözlərə cavab verib.

Komanda.az İngiltərə mətbuatına istinadən xəbər verir ki, ispan mütəxəssis, Kloppun “şəhərlilər”in hər il transferlərə yüksək məbləğdə pul xərcləməsi ilə bağlı dediyi sözlərə belə cavab verib:

“Bu, “Liverpul”dur, o kiçik komanda deyil. Amma bu sözlər məni narahat edir, çünki hər transfer pəncərəsi dövründə yüz milyonlarla pul xərclədiyimiz doğru deyil. Bunlar həqiqətdən uzaq sözlərdir. Keçən mövsüm biz transferlərə sadəcə 17 milyon funt-sterlinq pul xərcləmişik.  Hər mövsüm 200 milyon pul xərcləyə bilmərik. Bu, reallıqdır. Digər baş məşqçilər istədiklərini deyə bilərlər, amma mən sadəcə, bunun doğru olmadığını deyə bilərəm”.

Klopp dünyada sadəcə 4 klubun – “Barselona”, “Real”, “Mançester Siti” və PSJ-nin hər il transferlərə böyük pullar xərcləyə bildiklərini demişdi.