“Bu hesab mənim üçün problem deyil” – Klopp

Çempionlar Liqasının 1/8 final mərhələsinin ilk oyunları çərçivəsində “Bavariya” ilə 0:0 hesablı bərabərliyə razılaşan “Liverpul”un baş məşqçisi Yurgen Klopp, matçdan sonra açıqlama verib.

Komanda.az Almaniya mətbuatına istinadən xəbər verir ki,  alman mütəxəssis, oyunun çətin keçdiyini bildirib:

“Bavariya” fiziki olaraq çox güclü komandadır. Cərimə meydançasının ətrafında çox oynadıq. İki komanda üçün də çətin oyun keçdi, müdafiəçilər çox yaxşı oynadılar. Xüsusilə, Cordan Henderson bu gün fantastik oyun göstərdi. Oyunda son nöqtəni qoya bilməməyin problemini yaşadıq. Daha yaxşı oynaya bilərik və oynamalıyıq”.

51 yaşlı mütəxəssis, bu hesabın onun üçün problem yaratmadığını deyib:

“Bu hesab mənim üçün problem deyil. 0:0 hesabı pis nəticə deyil, təbii ki, möhtəşəm nəticə də əldə etmədik. Hər iki komanda hörmət ediləcək oyun sərgilədi. “Bavariya”lılar bizə çətin anlar yaşatdılar. Cavab oyununu onlar üçün daha çətin vəziyyətə gətirə bilərdik, amma fürsətləri dəyərləndirə bilmədik”.