Boksçular Avropa Oyunlarına İtaliya və Türkiyədə hazırlaşır

Kişi və qadın boksçulardan ibarət Azərbaycan milli komandaları üçüncü Avropa Oyunlarına hazırlığın son mərhələsinə start veriblər.

Komanda.az xəbər verir ki, hər 2 yığma təlim-məşq toplanışını ölkə xaricində keçir.

Baş məşqçi Pedro Roke, məşqçilər Nəriman Abdullayev və Etibar Abdullayevin rəhbərliyi altında 9 boksçumuz İtaliyanın Assizi şəhərində hazırlığa başlayıb. Çalışdırıcılar yekun heyəti müəyyənləşdirmək üçün toplanışa Məsud Yusifzadə, Nicat Hüseynov (hər ikisi 51 kq), Ümid Rüstəmov (57 kq), Malik Həsənov (63,5 kq), Nəbi İsgəndərov (67 kq), Sərxan Əliyev (71 kq), Murad Allahverdiyev (80 kq), Alfonso Dominqes (86 kq) və Məhəmməd Abdullayevi (+92 kq) cəlb ediblər.

Komandamız Assizidə İtaliya, Avstriya, Belçika, Serbiya, İrlandiya, Böyük Britaniya, Niderland, Estoniya, Finlandiya və Slovakiya ilə birgə hazırlıq keçir.

Baş məşqçi Yadigar Məmmədov və məşqçi İlkin Ağayevin rəhbərlik etdiyi qadınlardan ibarət milli komanda isə Türkiyənin Kastamonu şəhərində məşqləri davam etdirir. Hazırlıqda Mehparə Məmmədova (48 kq), Anaxanım İsmayılova (50 kq), Zeynəb Rəhimova (54 kq), Məhsəti Həmzəyeva (57 kq), Şəhla Allahverdiyeva (66 kq) və Aynur Rzayeva (75 kq) iştirak edirlər. Kastamonudakı toplanışda təmsilçilərimiz Türkiyə və Cənubi Koreya ilə birgə hazırlıq keçir.

Hər 2 yığma iyunun 16-da Bakıya dönəcək.

Polşada keçiriləcək Avropa Oyunlarında boks yarışları iyunun 23-dən iyulun 2-dək “Novi Tarq Arena” baş tutacaq.