“Azərbaycan millisinin böyüyəcəyinə və daha yaxşı bir gələcəyi olacağına inanıram”

Azərbaycan millisinin baş məşqçisi Canni De Byazi “irishexaminer.com” saytına müsahibə verib.

Komanda.az xəbər verir ki, italyan mütəxəssis, müsahibəsində bunları qeyd edib:

“Azərbaycanı seçdim, çünki Albaniyada yaşadığım təcrübəni burda yenidən yoxlamaq istədim. Başlanğıc olaraq aşağı-yuxarı eyni vəziyyət idi. Məqsəd zamanla davam edə biləcək heyət yaratmaqdır. Yaxşı təşkil olunmuş, böyümək arzusu olan bir futbol federasiyası tapdım. Məni bura gətirən və 110 faizlik gücümü verməyə çalışmağıma təşviq edən budur.

Xəzərin sahilində yerləşən Bakıda həyat yaxşıdır. Tarixən köhnə olan, möhtəşəm şəkildə qorunan və UNESCO-nun irs siyahısına salınmış şəhərdir. Çempionatdakı klubların demək olar hamısı paytaxtda oynayır. Çünki şəhərdən kənarda cəmi iki klub var.

Azərbaycan Premyer Liqasında cəmi 8 klub var və onların əksərində legionerlər çoxluq təşkil edir. Yığma ilə bağlı seçim etmək üçün məhdud oyunçu toplusu var. Burda asan deyil. Azərbaycan futbolu hələ də qapalı dünyadır. Bir neçə oyunçu xaricdə çıxış etməyə yeni başlayıb. Bu baxımdan daha çox oyunçunun beynəlxalq səviyyədə təcrübə qazanmaq şansına sahib olacağına ümid edirik.

DÇ-2022-nin seçmə mərhələsinin qalan oyunlarında xallar qazanmaq istəyirik. Asan olmayacaq, kağız üzərində daha güclü olan rəqiblərimiz var. Amma bu, futboldur. Belə şeylərə fikir verməmək lazımdır. Daha çox qazanmaq istəyən, daha qətiyyətli və yaxşı təşkilatlananlar bəzən keyfiyyətsiz komanda olsa belə, mümkünsüz görünən matçlarda qələbə qazana bilər.

Azərbaycan milli komandasının böyüyəcəyinə və daha yaxşı bir gələcəyi olacağına inanıram. Hər kəs kimi bizim də xəyallarımız və planlarımız var. Hazırda həm Portuqaliya, həm də Serbiyanın texniki dəyərinin bizdən üstün olduğunu nəzərə alsaq, çətin qrupda olduğumuzu deyə bilərik. İngiltərə çempionatında çıxış edən oyunçuları olan İrlandiya ilə bağlı da vəziyyət eynidir. Həmçinin 12 ildir eyni baş məşqçi ilə layihəsini davam etdirən Lüksemburq da var”.