Azərbaycan millisi Belarusdan qələbəsiz qayıtdı

Kişi voleybolçulardan ibarət Azərbaycan millisinin Belarusda təşkil olunan təlim-məşq toplanışı başa çatıb.

Komanda.az xəbər verir ki, iyulun 9-dan paytaxt Minskdə hazırlıq keçən Pərviz Səmədovun rəhbərlik etdiyi komanda bu gün Bakıya qayıdıb.

Milli səfərdə yerli yığma ilə üç yoxlama matçı da keçirib. Belarus millisi ilə keçirilən hər üç görüşdə rəqib qələbə qazanıb.

Avropa çempionatının təsnifat mərhələsinə və İslam Həmrəyliyi Oyunlarına hazırlaşan yığma təlim-məşq toplanışının son mərhələsini Bakıda davam etdirəcək.

Komanda ilk rəsmi matçını avqustun 3-də Bakıda AÇ-2023-ün təsnifat mərhələsində Danimarka komandasına qarşı keçirəcək.