Azərbaycan milliləri Avropa kubokunda mübarizə aparacaq

Azərbaycanın 3×3 basketbol üzrə kişi və qadın milliləri Avropa kubokunda mübarizə aparacaq.

Komanda.az Basketbol Federasiyasının mətbuat xidmətinə istinadən xəbər verir ki, 3×3 basketbol üzrə kişilər və qadınlar arasında Avropa kubokunun oyunları baş tutacaq.

Avropa kubokunda mübarizəyə ilk olaraq qadın millimiz start verəcək. İspaniya və Avstriya yığmaları ilə qarşılaşacaq qızlarımızın ilk qrup oyunu 22 avqust Bakı vaxtı ilə saat 15:40-da İspaniya seçməsinə qarşı olacaq. İkinci qrup oyununda isə milli komanda saat 19:15-də Avstriya yığması ilə üz-üzə gələcək.

Kişi millimizin isə qrupdakı rəqibləri yerli Avstriya və Niderland seçmələridir. İlk qrup oyunu 23 avqust Bakı vaxtı ilə saat 15:40-da Niderland, ikinci görüş isə saat 19:15-də Avstriya yığmalarına qarşı olacaq.

Avropa kubokunun oyunları avqustun 22-25-də Avstriyanın paytaxtı Vyana şəhərində keçiriləcək. Qruplarda ilk iki sıranı tutmuş komandalar 1/4 finala vəsiqə qazanacaqlar.