“Azərbaycan çempionatında basketbol komandamız olacaq” – Qurban Qurbanov

“Qarabağ”ın baş məşqçisi Qurban Qurbanov 3×3 basketbol üzrə dünya qadın seriyasının Şuşa mərhələsi zamanı jurnalistlərə açıqlama verib.

Komanda.az xəbər verir ki, baş məşqçi, Azərbaycan çempionatında basketbol komandalarının olacağını bildirib:

“Böyük ehtimalla, Azərbaycan çempionatında basketbol komandamız olacaq. Bu barədə təklif olub. Rəhbərliyimizin elm və təhsil naziri Emin Əmrullayevlə bu barədə görüşü olub. Düzdür, tam işin içində deyiləm. Amma müzakirələrin aparılması barədə məlumatım var. Belə bir variantın olma ehtimalı var”.

Qurbanov basketbola həmişə maraq göstərdiyini deyib:

“Sadəcə, çoxdan idi ki, canlı izləmirdim. Cənab nazir dəvət elədi, böyük məmnuniyyətlə qəbul etdim. Mənim üçün çox maraqlı və xoş oldu. Həm bu gözəl diyarı gördüm, həm də belə yarışda iştirak elədim”.

O, Şuşada olduğu müddətdə şəhəri gəzdiyini də sözlərinə əlavə edib:

“Şuşada çox yeri gəzdim. Hamının marağında olan yerləri gördüm, çox sevindim. Xatirələrimdə qalacaq günlər oldu”.

“Köhlən atlar”ın baş məşqçisi, həmçinin, yeni transfer axtarışlarını davam etdirdiklərini bildirib:

“Hamidu Keytadan başqa, hələlik yeni transferimiz yoxdur. Amma həmişəki kimi, iş gedir, axtarışdayıq”.