“Yuventus” “Barselona”dan daha yaxşı komandadır” – Pirlo

İtaliya millisinin sabiq futbolçusu Andrea Pirlo Çempionlar Liqası ilə bağlı açıqlama verib.

Komanda.az İtaliya mətbuatına istinadən xəbər verir ki, 39 yaşlı sabiq futbolçu, “Yuventus”un turnirin favoritləri arasında göstərilən “Barselona”dan daha yaxşı olduğunu deyib:

“Məncə, “Yuventus” “Barselona”dan daha yaxşı komandadır. “Mançester Siti” də təhlükəli rəqibdir, amma “Yuventus” kuboku qazanmaq mövzusunda bir addım irəlidədir.

Kriştiano Ronaldo olmasaydı, “Atletiko” ilə matç 3:0 deyil, 1:0 bitərdi. O, komandaya çox tez uyğunlaşdı və fərq yarada bildi”.

Sabiq futbolçu, Çempionlar Liqasının 1/4  final mərhələsində “Yuventus” – “Ayaks” cütünü də dəyərləndirib:

“1/4 final mərhələsində “Ayaks”la qarşılaşmağımız yaxşı oldu. “Ayaks” “Real”la matçda möhtəşəm oynadı, amma Madrid klubu da çox pis hazırlanmışdı. “Yuventus” “Ayaks”dan üstündür”.

Pirlo 2011-2015-ci illərdə “Yuventus”un şərəfini qoruyub.