“Neftçi”dəki hər bir şəxs Regekampfın oynatdığı oyunu bəyənir” – Müsahibə

“Neftçi”nin nigeriyalı futbolçusu Yusuf Lavalın Komanda.az saytına müsahibəsi:

• 2020-ci ildən “Neftçi”də forma geyinirsiz. Bu müddətdə Azərbaycana, ölkə futboluna tam uyğunlaşa bilmisiz? 

• Bəli, uyğunlaşmışam. Bununla bağlı demək olar, heç bir problem yaşamıram.

• Bakıda xoşunuza gələn və gəlməyən nələr var?

• Burada çox şey xoşuma gəlir. İnsanların qonaqpərvərliyi, mehribanlığı…

• “Neftçi”də daha çox kiminlə vaxt keçirirsiz? 

• Bütün komanda yoldaşlarımla münasibətim yaxşıdır. Amma Mamadu Mbodjla daha çox birlikdə vaxt keçiririk.

• Bu iki ildə “Neftçi” ilə keçirdiyiniz oyunlardan ən çox yadınızda hansı qalıb? 

• Ötən mövsüm Avropa Konfrans Liqasında “Makkabi” (Hayfa) ilə ilk oyun mənim üçün ən unudulmazdır. Düzdür, matç 3:3 hesabı ilə nəticələnmişdi, amma evdə, azarkeşlərimizin gözü önündə iki qola imza atmışdım.

• “Neftçi”də bir neçə baş məşqçi görmüsüz. Hazırkı baş məşqçiniz Laurentsiu Regekampfı digərlərindən fərqləndirən nədir? 

• Bu məşqçilərin hər birinin öz xüsusiyyəti var, amma fikrimcə, Regekampf digərlərindən daha iddialı olması və təcrübəsi ilə fərqlənir.

• Regekampfın oynatdığı və ya oynatmağa çalışdığı futbol tam ürəyinizcədir?

• Bəli, əlbəttə, ürəyimcədir. Düşünürəm ki, klubdakı hər bir şəxs onun oynatdığı oyunu bəyənir. Regekampfın gəlişindən sonra komandanın oyunundakı dəyişiklik göz qabağındadır.

• Bəlkə, bu mövzuya qayıtmaq ürəyinizcə olmayacaq. Amma maraqlıdır, Konfrans Liqasında “Rapid”i keçə bilməməyinizin səbəbi nə idi? 

• Bunun bir çox səbəbi var. Məsələn, ilk oyunun son dəqiqəsində buraxdığımız qol həlledici oldu. Bir tərəfdən də, sanki bəxt bizdən üz döndərmişdi.

• Komandanız yeni mövsümə pis başlamayıb. Cəmi bir məğlubiyyət və beş qələbə. Hədəf nədir, çempionluq?

• Bəli, məqsədimiz çempionluq uğrunda sonadək mübariz aparmaq və buna nail olmaqdır.

• Daha çox hansı komandanı çempionluq yarışında “Neftçi” üçün əsas rəqib sayırsız?

• Son mövsümləri və komandaların hazırkı gücünü nəzərə alsaq, “Qarabağ”ı əsas rəqib hesab edirəm. İlk turlardan etibarən “Sabah” klubu da gücünü ortaya qoymağı bacarıb. Ümumiyyətlə, bizi qarşıda çox maraqlı oyunlar gözləyir.

• Azərbaycanda elə bir futbolçu varmı ki, “Neftçi”də oynamasını istəyəsiz? 

• Əlbəttə, var, amma hesab edirəm ki, ad çəkməyim doğru olmaz. Ümumiyyətlə, Azərbaycan çempionatında yaxşı futbolçu çoxdur.

• “Neftçi”də olduğunuz müddətdə hansısa başqa klubdan təklifiniz olub? 

• Bəli, olub, amma bu haqda ətaflı danışmağım düzgün çıxmaz.

• “Neftçi” ilə müqaviləniz nə vaxt bitir? Burada uzun müddət qalmaq istəyirsiz, yoxsa…

• “Neftçi” ilə müqaviləm mövsümün sonunda bitir. Burada özümü xoşbəxt hiss edirəm, amma gələcəkdə nə olacağını indidən bilmək olmaz. Ona görə də, gəlin bunu zamanın axarına buraxaq.

Mehri Qurban