“Onların yaşı məni maraqlandırmır” – Pioli

“Milan”ın çalışdırıcısı Stefano Pioli İtaliya A Seriyasının 37-ci turunun “Yuventus”la matçından sonra (1:0) açıqlama verib.

Komanda.az “La Gazetta dello Sport”-a istinadən xəbər verir ki, o, keyfiyyətli oyunçulara ehtiyac duyduqlarını deyib:

“Cari mövsümdə UEFA Çempionlar Liqasında bizdən gözləniləndən daha yaxşı çıxış etdik. Amma ölkə çempionatı haqda eyni sözləri demək olmaz. Uzun müddətdən sonra eyni anda iki böyük turnirdə mübarizə apardıq. Səhvlərə yol verməyimiz heç kimə sirr deyil.

Skudetto uğrunda mübarizə aparmaq və Çempionlar Liqasında yenidən uğur qazanmaq istəyiriksə, yayda heyəti gücləndirməliyik. Komandanın səviyyəsini yüksəldə biləcək keyfiyyətli oyunçulara ehtiyacımız var. Onların yaşı məni maraqlandırmır”.

“Rossonyerlər” “Yuventus”u məğlub edərək, 2023/24 mövsümündə Çempionlar Liqasında iştirakını rəsmiləşdirib.

“Milan” hazırda ölkə çempionatının turnir cədvəlində 67 xalla dördüncü, “qoca sinyora” isə 59 xalla yeddinci pillədə qərarlaşıb.