“Yaxşı nəticə qazanmaq üçün zamana ehtiyacımız var”

Futzal üzrə UEFA Çempionlar Liqasının qrup mərhələsində son oyununu keçirən “Araz Naxçıvan” Bosniya və Herseqovina təmsilçisi “Mostar”a 2:3 hesabıyla uduzub.

Komanda.az xəbər verir ki, təmsilçimizin baş məşqçisi Joze Alesio Da Silva oyundan sonra federasiyanın rəsmi saytına açıqlama verib:

“Ötən oyundan sonra da demişdim, bu dəfə də həmin fikri səsləndirirəm: oyuna nəzarət bizdə idi. Çox sayda qol epizodu yaratdıq, təəssüf ki, yenə istifadə edə bilmədik. Əlbəttə, yaxşı oynamağa görə xal vermirlər. Ortada qələbə yoxdursa, məğlubiyyətlər varsa, bu yaxşı hal deyil.

Bu heyəti cəmi üç aydır yığmışıq. Rəqiblərimiz isə illərdir ki, bir yerdə oynayırlar. İsveç komandasını hamı zəif görürdü, amma elə deyil. Komanda üzvləri iki ildən artıqdır ki, bir yerdə çıxış edir, nəticələr qazanırlar. Serbiya çempionu haqda isə geniş danışmağa dəyməz. Onların nə qədər təcrübəli olduqlarını matçlar da göstərdi, əksəriyyəti ölkəsinin millisində çıxış edirlər. Burada yeni heyətə malik komanda yoxdur. “Mostar” da “Lozniça Qrad” kimidir. 1-2 yeni oyunçu cəlb ediblər, qalanları illərdir ki, buradadır. Yenə deyirəm, komandam sona qədər mübarizə apardı, heç bir rəqibdən çəkinmədi. Ancaq yaxşı nəticə qazanmaq üçün zamana ehtiyacımız var. Komandamın perspektivinə inanıram. İkinci oyundakı epizodlarımızı realizə edə bilsəydik, bu gün meydana başqa atmosferdə çıxacaqdıq. Belə vəziyyətdə komandanı motivasiya etmək də çətin olur. Hakimlər haqda isə danışmaq istəmirəm. Bizim hər hərəkətimizi cərimə kimi qiymətləndirirlər, amma gözlərinin qabağında baş verən aqressiv hərəkətə sarı vərəqə göstərməklə kifayətlənirlər. Halbuki həmin epizod zamanı oyunçumuz daha ciddi zədə ala bilərdi”.