“Yaşadığımız hisslər möhtəşəmdir” – Arteta

İngiltərə Premyer Liqasının 21-cı turu çərçivəsində “Mançester Yunayted”ə 2:0 hesabı ilə qalib gələn “Arsenal”ın baş məşqçisi Mikel Arteta açıqlama verib.

Komanda.az İngiltərə mətbuatına istinadən xəbər verir ki, 37 yaşlı mütəxəssis, futbolçuların oyunundan razı qaldığını bildirib:

“Yaşadığımız hisslər möhtəşəmdir. İlk yarı ikincidən daha yaxşı alındı. Futbolçular nəzərdə tutulan hər şeyi yerinə yetirə bildilər. Fasilədən sonra onlar fiziki cəhətdən yoruldular, amma qələbə istəyi möhtəşəm idi. Çox xoşbəxtəm, futbolçularla, göstərdikləri oyunla qürur duyuram. Çalışıram ki, qısa müddətdə futbolçulara kömək edə bilim, onlar düzgün quruluş yaratsınlar. Oyunumuz da getdikcə daha da yaxşılaşır.

Azarkeşlərə böyük təşəkkür düşür, onlara həqiqətən ehtiyacımız var. Azarkeşlər yanımızda olanda, futbolçular daha yaxşı çıxış edirlər. Ümid edirəm ki, bu gün onları az da olsa, sevindirə bildik”.