Yalan və saxtakarlığın qapısına 6 qol!

Rəşad Ergün

Azərbaycanın 19 yaşadək futbolçulardan ibarət milli komandası Avropa çempionatında keçirdiyi ilk oyunda İslandiyaya 0:2 hesabı ilə uduzub.

17 yaşadək futbolçular isə Avropa çempionatının seçmə mərhələsindəki ilk matçında Macarıstana 0:4 hesabı ilə məğlub olub. İki oyun və Azərbaycan futbolunun sifətinə çırpılan 6 qol.

Belə…

FİFA prezidenti Canni İnfantinonu, bir ətək pul töküb braziliyalı keçmiş futbolçu Ronaldinyonu Bakıya gətirə bilərsiz. Pul da xalqındır, futbol meydanlarında hamı tərəfindən qapazlanan da xalqın balalarıdır. Amma bir şeyi bilin ki, futbolda saxtakarlıq, yalan, hay-küy, əl çalmalar, “möhtəşəm qayğının nəticəsi” kimi əttökən, yaltaq ifadələr heç bir addım da atmır. Futbol – meydana çıxıb göstərdiyindir və elə meydana çıxdığın ana kimi olur saxtakarlıqların, yalanların, yaltaqlıqların ömrü.

Xatırlayasız deyə, yazdım. Unuda və yenə yaltaqlanmağa, əl çalmağa, “urra” deyibən qışqırmağa davam edə bilərsiz.