Xavi: “Bu, Roke üçün çox vacib məqamdır”

“Barselona”nın baş məşqçisi Xavi İspaniya çempionatının 20-ci turunda “Osasuna” ilə matçda (1:0) Vitor Rokenin debüt qolundan danışıb.

Komanda.az DAZN-a istinadən xəbər verir ki, o, bu qolun braziliyalı futbolçunun komandaya daha çox uyğunlaşmasına təsir edəcəyini söyləyib:

“Bu, Roke üçün çox vacib məqamdır. Onun “Barselona”da ilk qolundan sonra hisslərini təsəvvür edin. Belə gənc oyunçu üçün tədricən yeni şəraitə alışmaq çox vacibdir.

Düşünürəm ki, bugünkü qələbə onun uyğunlaşma prosesinə çox ciddi təsir edəcək. Roke işləyən, rahatlıqla oynayan və çox hərəkət edən yaxşı bir oyunçudur. Məqsədləri ona gələcəkdə özünü sübut etməyə kömək etməlidir”.

Qolun vurulmasına bir dəqiqə qalmış əvəzedici kimi meydana çıxan 18 yaşlı futbolçunun dəqiq zərbəsi kataloniyalılara “Osasuna” ilə görüşdə minimal hesablı qələbə qazandırıb.

La Liqada 22 oyundan sonra “Barselona”nın 47 xalı var və üçüncü yerdədir.