“Xarakter göstərməyi bacardıq” – Adrian Mutu

“Neftçi”nin baş məşqçisi Adrian Mutu Premyer Liqanın 3-cü turunda səfərdə “Sabah”a qarşı keçirdikləri oyunu şərh edib.

Komanda.az xəbər verir ki, o, 1:1 hesablı heç-heçədən sonra bunları söyləyib:

“Ağır və çətin oyun oldu. Xarakter göstərməyi bacardıq. Futbolçularımı təbrik edirəm. Meydanda sona kimi vuruşdular. Qələbə qazanmağa çalışdıq. Təəssüf ki, alınmadı. Vacib olan komandanın qələbə üçün sona qədər mübarizə aparmasıdır.

Rza Cəfərovun performansı məni qane etdi? Çətin oyun idi. Onu oynatmaq riskli görünürdü. Amma Rza bu gün göstərdi ki, gələcəkdə Azərbaycanın bir nömrəli qapıçılarından biri ola bilər.

Qara Qarayevin gərgin olduğunu deməzdim. Qara oyuna köklənmişdi. Yavaş-yavaş öz istədiyi formaya çatır. Bu gün “Neftçi”də ən yaxşı oyununu oynadı. Onun bizə çox köməyi dəyəcək”.