Van Dayk “Liverpul”la danışıqlar haqda: “Heç bir xəbər yoxdur”

“Liverpul”un müdafiəçisi və kapitanı Vircil van Dayk yeni müqaviləyə görə klub rəhbərliyi ilə aparılan danışıqlarla bağlı jurnalistlərin suallarını cavablandırıb.

Komanda.az “Mundo Deportivo”-ya istinadən xəbər verir ki, niderlandlı futbolçu hələ heç bir xəbərin olmadığını bildirib:

“Hələ heç bir xəbər, yeni heç nə yoxdur”.

Van Daykla “Liverpul” arasında hazırkı müqavilə gələn ilin yayında başa çatacaq. O, yanvarda digər klublarla danışıqlara başlaya bilər.

32 yaşlı futbolçu 2018-ci ildən İngiltərə komandasında çıxış edir. O, İngiltərə Premyer Liqasının cari mövsümündə 14 oyun keçirib, 1 qol vurub və 1 məhsuldar ötürmə edib.